Bashkimi debutoi në grupet e FIBA Europe Cup. Nënkampioni i Kosovës pësoi nga Cibona në Kroaci me rezultat 93:79 (18:22, 29:19, 27:15, 19:23).

Skuadra prizrenase e nisi ndeshjen shumë mirë, duke arritur të fitojë çerekun e parë 18:22, derisa lojë e baraspeshuar u zhvillua në çerekun e dytë, deri në minutën e fundit, pranë rezultatit 39:39, por më pas vendasit u shkëputën, duke shkuar në pushim me rezultat 47:41.

Kroatët ishin më të mirë në periodën e tretë, 27:15, ku shifrat pas 30 minutash ishin 74:56, derisa dhjetë minutat e fundit ishin më të baraspeshuar, por që nuk kishte dallim të madh në rezultatin përfundimtar, që ishte 93:79.

Te Bashkimi u dalluan Kyan Anderson me 22 pikë, Jan Palokaj me 16 dhe Isaiah Cousins me 15.

Ndeshjen e ardhshme Bashkimi e zhvillon si mysafir i Pallacanestro Reggiana më 22 tetor. 

Federata e Basketbollit e Kosovës (FBK) vazhdon të organizojë ngjarje të rëndësishme të basketbollit ndërkombëtar.

Për herë të parë në vendin tonë do të mbahen dy evente shumë të rëndësishme si, FIBA Europe U14 Get-Together dhe takimi i Komisionit të të Rinjve të FIBA Evropës (FIBA Europe Youth Commission).

Ngjarjet do të mbahen në Prishtinë, më 17-19 tetor 2025.

FIBA Europe U14 Get-Together zhvillohet përgjatë tri ditëve, ndërsa më 17 tetor mbahet edhe takimi i Komisionit të të Rinjve të FIBA Evropës.

Gjatë këtyre dy ngjarjeve shumë të rëndësishme, FBK ka nderin të mirëpresë:

1. Jorge Garbajosa, Kryetar i FIBA Evropës dhe udhëheqës i Komisionit,
2. Kamil Novak, Drejtor Ekzekutiv i FIBA Evropës,

si dhe shumë drejtues të tjerë të federatave evropiane.

Kryetari i FBK-së, Arben Fetahu është nënkryetar i këtij komisioni, derisa kujtojmë që Fetahu, është edhe anëtar i Bordit të FIBA Evropës. Takimi mbahet të premten nga ora 10:00 deri në ora 15:00 në Courtyard by Marriott.

FIBA Europe U14 Get-Together do të mbledhë trajnerë nga mbarë Evropa, ku përgjatë tri ditëve do të ligjërohet për punën me grupmosha të reja.

Kjo ngjarje e përvitshme e FIBA Europe synon edukimin e trajnerëve të rinj dhe fuqizimin e gjeneratave të ardhshme të basketbollistëve, duke e vendosur Kosovën në qendër të zhvillimeve ndërkombëtare sportive.

Në këtë aktivitet do të marrin pjesë rreth 80 trajnerë nga i gjithë kontinenti, të cilët do të ndjekin ligjërata dhe trajnime nga ekspertë të njohur të basketbollit evropian. Ndërkaq, në ditën e dytë të këtij eventi, më 18 tetor 2025, eventi do të jetë i hapur për trajnerët nga Kosova të gjeneratave të reja.

Bashkimi do të debutojë sonte ne grupet e FIBA Europe Cup.

Prizrenasit për herë të parë garojnë në grupet e kësaj gare shumë të rëndësishme evropiane.

Nënkampioni i Kosovës është mysafir i Cibonës, takim që zhvillohet në Kroaci, edhe pse ishte e planifikuar të luhet në Prizren, megjithatë është zhvendosur në Kroaci, për shkak se palestra është e zënë me numërimin për Zgjedhjet Lokale në Kosovë.

Cibona është një skuadër e njohur ballkanike dhe evropiane, e nuk do të jetë sfidë aspak e lehtë për Portokallezinjtë, që synojnë përfaqësim sa më të mirë në këtë garë.

Në Grupin J bëjnë pjesë edhe Dijon e Pallacanestro Reggiana, ku në sfidën e së mërkurës fitoi skuadra italiane në Francë me rezultat 88:96.

Ndeshja Cibona-Bashkimi zhvillohet nga ora 18:30.

Trepça ka luftuar deri në fund ndaj nënkampionit të FIBA Europe Cup, PAOK, por kampionët e Kosovës pësuan 85:74 (27:20, 18:13, 18:22, 22:19), në sfidën e zhvilluar në Greqi.

Kampionët e Kosovës nuk kishin udhëtuar për tu dorëzuar dhe kjo u pa në çerekun e parë, që ishte i baraspeshuar, deri pranë rezultatit 19:20, kur vendasit me tetë pikë radhazi, e fituan këtë pjesë 27:20. Skuadra greke në periudhën e dytë kishte deri në 15 pikë epërsi 45:30, ndërsa shkuan në pushim me shifrat 45:33.

Në periudhën e tretë, skuadra mitrovicase ishte më e mirë, 18:22, duke bërë që ndeshja të vendosej në fund dhe kështu edhe ndodhi. Pesë minuta nga fundi, Trepça afroi rezultatin në 71:70, por më pas vendasit ishin më të vëmendshëm dhe fituan 85:74.

JaCori Payne shënoi 19 pikë për Trepçën, ndërsa nga 13 shtuan Adnan Arslanagic dhe Chad Brown.

Trepça ndeshjen e ardhshme në kuadër të Grupit F e zhvillon ndaj Braunschweig më 22 tetor në Mitrovicë.