Federata e Basketbollit e Kosovës (FBK) po vazhdon me aktivitetet në kuadër të kampanjës së FIBA-s “Her World, Her Rules” (HWHR).

Aktiviteti i radhës u mbajt në Shkollën Fillore të Mesme të Ulët “Fazli Grajçevci” në Mitrovicë.

Në event kanë marrë pjesë më shumë se 150 vajza të kësaj shkolle, në një aktivitet madhor për vajzat në basketboll.

Në këtë stërvitje argëtuese vajzat kanë pasur mundësi të argëtohen, por edhe të mësojnë për rëndësinë e basketbollit.

Menaxherja e Projekteve në Federatën e Basketbollit të Kosovës (FBK), Edita Medunjanin ka folur për rëndësinë që vajzat të merren me basketboll dhe një ditë të jenë pjesë e rëndësishme e sportit tonë të zemrës.

Në këtë ngjarje të organizuar nga FBK, kanë marrë pjesë edhe basketbollistja e Kosovës, Malvina Haziri, si dhe Egzon Uka, Artina Hasani, Arta Mustafa dhe Mert Zekerija si trajnerë/trajnere.

Kjo është një iniciativë që synon të promovojë dhe fuqizojë vajzat dhe gratë në basketboll.

Qëllimi i këtij organizimi është të rrisë ndërgjegjësimin për rëndësinë e përfshirjes së vajzave dhe grave në basketboll, të promovojë barazinë gjinore në sport dhe të krijojë mundësi të reja për talentet e reja në këtë disiplinë.

Federata e Basketbollit e Kosovës (FBK) është pjesë e projektit FIBA Europe Girls’ Program tash e shtatë vjet dhe është duke e implementuar me mjaft sukses këtë projekt.

“Her World, Her Rules” është një projekt unik dhe fushatë në mediat sociale, e udhëhequr nga FIBA Europe që ka për qëllim ta promovojë basketbollin e femrave dhe vajzave nëpër Evropë nëpërmjet aktiviteteve të ndryshme që realizohen në partneritet me Federatat Nacionale.

Trepça ka triumfuar në finalen e dytë të “Play-off”-it ndaj Bashkimit me rezultat 79:72 (20:20, 21:21, 17:17, 21:14).

Tani seria barazohet në 1:1.

Vendasit të përkrahur nga tifozët e nisën ndeshjen për mrekulli, me një seri prej 7:0, por prizrenasit u kundërpërgjigjën shpejt, për të përmbysur shifrat në 16:20, derisa çereku i parë përfundoi 20:20. Prizrenasit në periudhën e dytë, tri herë kishin epërsi deri në shtatë pikë, por mitrovicasit nuk u dorëzuan dhe në fund barazuan shifrat në 41:41, sa përfundoi pjesa e parë.

Edhe perioda e tretë ishte tërësisht e barabartë 17:17, ndërsa në dhjetë minutat e fundit dhe vendimtar, mitrovicasit ishin më të mirë për të triumfuar 79:72.

Më të mirët te Trepça ishin Tekele Cotton me 22 pikë e tetë asistime, Michael Myers me 22 pikë e nëntë kërcime dhe Drilon Hajrizi me 15 pikë e shtatë kërcime, kurse te Bashkimi, Lejson Zeqiri dhe Dirk Williams kishin nga 16 pikë, ndërsa Jayveous Mckinnis 12 pikë e dhjetë kërcime.

Ndeshja e ardhshme zhvillohet të dielën në Prizren, ndërsa skuadra që shënon katër fitore shpallet kampione e Kosovës.

Federata e Basketbollit e Kosovës (FBK) në bashkëpunim me Fakultetin e Edukimit Fizik dhe Sportit ka ndarë dy bursa për studentët e këtij fakulteti.

Në ceremoninë e organizuar sot gjithsej janë ndarë tetë bursa, dy nga basketbolli, dy nga hendbolli, dy nga volejbolli dhe dy nga Federata e Sporteve Universitare të Kosovës.

Kryetari i Federatës së Basketbollit të Kosovës (FBK), Arben Fetahu ka ndarë bursat për Bleona Junikun dhe Adhurim Aliaj.

Fetahu po ashtu ka pranuar një mirënjohje nga Dekani i Fakultetit të Edukimit Fizik dhe Sportit, Florian Miftari, i cili është edhe anëtar i Bordit të FBK-së.

Fakulteti i Edukimit Fizik dhe Sportit ka falënderuar të gjitha federatat që ndan bursat, duke theksuar po fuqizohet një gjeneratë e tërë që synon të bëjë ndryshimin në sport dhe në shoqëri.

FBK vazhdimisht ka përkrahur gjeneratat e reja dhe të rinjtë që premtojnë në basketboll. 

Super finalet e “Play-off”-it të ProCredit Superligës vazhdojnë me super sfida interesante.

Beteja zhvendoset në Mitrovicë, ku të mërkurën zhvillohet ndeshja e dytë finale.

Takimin e parë e fituan prizrenasit 84:77, për të krijuar epërsinë prej 1:0 në serinë finale. Skuadra që shënon katër fitore shpallet kampione e Kosovës.

‘Xehetarët’ synojnë fitoren për të barazuar serinë në 1:1, ndërsa Portokallezinjtë për të krijuar epërsinë 2:0 dhe të afrohen te titulli.

Mitrovicasit synojnë mbrojtjen e titullit, kurse prizrenasit të fitojnë titullin e parë pas vitit 2018, kur e fituan për herë të parë dhe të fundit.

Ndeshja pritet të jetë mjaft interesante, ashtu si të gjitha takimet mes këtyre dy skuadrave në këtë edicion dhe një atmosferë e jashtëzakonshme në Mitrovicë.

Këto dy skuadra ishin përballur në finale të Kupës, ku fituan mitrovicasit. Ndërkohë, në garat e rregullta u përballën katër herë, me dy fitore ndaj njëra-tjetrës, ku të gjitha fitoret erdhën si vendas, si për Bashkimin, ashtu edhe për Trepçën.

Finalja 2

E mërkurë

19:00 Trepça - Bashkimi

Komiteti Olimpik i Kosovës (KOK) ka nënshkruar kontratat me 46 bursistë si “Shpresa Olimpike 2025”. Sportistët e rinj iu takojnë 18 federatave sportive.

Nga basketbolli janë Malvina Haziri dhe Yll Kastrati.

Marrëveshjen e kanë nënshkruar Ismet Krasniqi, president i Komitetit Olimpik të Kosovës, Granit Rugova, Drejtor i Programeve dhe Projekteve Zhvillimore në Federatën e Basketbollit të Kosovës, si dhe sportistët.

Sportistët do të marrin nga 150 euro në muaj gjatë vitit 2025 si Shpresa Olimpike.

Përzgjedhja është bërë, bazuar në rezultatet e sportistëve gjatë vitit 2024, gjithë përfshirjen dhe barazinë gjinore.

Malvia Haziri ka qenë pjesë e top 5 në ceremoninë e Laureatëve organizuar nga Federata e Basketbollit te Kosovës, ndërsa Yll Kastrati është shpallur “Shpresa e Vitit 2024”.

Bashkimi ka triumfuar në finalen e parë të “Play-off”-it. Prizrenasit fituan ndaj Trepçës me shifrat 84:77 (15:18, 23:14, 25:19, 21:26), për të krijuar epërsinë 1:0.

Fillimi i ndeshjes ishte i barabartë, ku asnjëra skuadër nuk arrinte të shkëputej, ku çereku i parë përfundoi 15:18. Por, prizrenasit ishin shumë më të mirë në periudhën e dytë, ku u shkëputën dhe shkuan në pushim me shifrat 38:32.

Pjesa e dytë ishte shumë interesante, me vendasit që kishin epërsi konstante dhe mysafirët që tentuan rikthimin, por nuk ia arritën qëllimit, pasi vetëm ngushtuan rezultatin në 71:67, megjithatë Bashkimi triumfoi në fund 84:77.

Te Bashkimi u dalluan Mack Smith me 22 pikë e tetë kërcime, Jayveous Mckinnis me 13 pikë e 11 kërcime dhe Wendell Green me 22 pikë, kurse te Trepça u dalluan Mikaile Tmusiq me 21 pikë dhe Michael Myers me dhjetë pikë e 13 kërcime.

Ndeshja e ardhshme zhvillohet të mërkurën në Mitrovicë, ndërsa skuadra që shënon katër fitore shpallet kampione e Kosovës.