Ish-basketbollistja, tani gjyqtare e basketbollit, Erisa Ibrahimi është vlerësuar me titullin Ambasadore për Paqe dhe të Drejtat e Njeriut, si njohje për kontributin në sport – në veçanti si gjyqtare e basketbollit dhe si edukatore sportive në shkollën amerikane në Mitrovicë.

 Ky çmim më është dhënë nga Tahir Shabani, ambasador i njohur ndërkombëtar për paqe dhe të drejtat e njeriut. “Jam e nderuar që përmes këtij vlerësimi përfaqësoj jo vetëm sportin tonë, por edhe vlerat e paqes dhe të drejtave të njeriut. Shpresoj që ky çmim të shërbejë si një nxitje për bashkëpunim të mëtejshëm dhe për vlerësimin e punës që bëjmë përmes sportit si mjet edukues dhe bashkues”, është shprehur Ibrahimi për faqen zyrtare të FBK-së.

 “Të jem përzgjedhur Ambasadore për Paqe dhe për të Drejtat e Njeriut është një nder i veçantë dhe një angazhim i thellë”, theksoi ish-basketbollistja e grupmoshave të Kosovës.

 “Si mësuese e edukatës fizike, gjyqtare e basketbollit dhe ish-basketbolliste, kam pasur mundësinë dhe vazhdojë të ndikoj në jetët e të rinjve duke përdorur sportin jo vetëm si mjet fizik, por edhe si platformë për edukim, barazi dhe bashkëjetesë. Sporti më ka formuar si njeri, më ka mësuar rregull, respekt, disiplinë dhe drejtësi – vlera që përpiqem t’i përçoj çdo ditë në punën dhe jetën time.

 Ky emërim më jep një përgjegjësi edhe më të madhe për të qenë zë i qartë për të drejtat e njeriut, për paqen dhe për fuqizimin e rinisë. E shoh këtë rol si një mundësi për të kontribuar më shumë në ndërtimin e një shoqërie ku secili ndihet i barabartë, i respektuar dhe i mbështetur.

 Faleminderit për besimin që më është dhënë. Do të jem gjithmonë në shërbim të vlerave që e bëjnë një komunitet të fortë dhe të drejtë”, përfundoi Erisa Ibrahimi.

Menaxherja e Eventeve dhe Basketbollit 3x3 në FBK 🏀, Artina Hasani dhe Fisnik Juniku, kanë përfunduar sesionin e radhës të FIBA Time-Out 3.0, që u mbajt në Athinë të Greqisë nga 23 deri më 26 qershor 📅.

Në Athinë të Greqisë kanë ligjëruar ekspertë nga FIBA, si Geoff Wilson, Delegatja Teknike e FIBA-s, Patricia Gulak-Lipka, Monika Puchner, Alistair Bowden, Isabella Dell Fiori, Povilas Baranauskas dhe Mark Bogaert. 

Hasani dhe Juniku përfaqësuan Federatën e Basketbollit të Kosovës në këtë sesion.

TIME-OUT është një program që ofrohet nga FIBA në partneritet me Universitetin Northumbria në Mbretërinë e Bashkuar. Ky program synon të ofrojë kualifikime akademike për ish-lojtarët elitarë dhe përqendrohet në karrierën e dyfishtë të lojtarëve të basketbollit.

Ky program është unik, duke u fokusuar në specifikat e basketbollit gjatë gjithë procesit akademik, përfshirë dhjetë module të fokusuara në parimet bazë të drejtimit të një organizate basketbolli. Ligjëratat, seminarët dhe punëtoritë do të mbahen në ngjarje sportive, në mjedisin akademik ose në zyrat e FIBA-s.

Modulet e TIME-OUT 3.0 përfshijnë:

Struktura e basketbollit në nivel global

Qeverisja e Mirë dhe Integriteti në Sport

Administrimi dhe çështjet operacionale

Planifikim strategjik

Menaxhimi i Projekteve

Menaxhimi i Garave dhe Ngjarjeve Sportive

Programet dhe Projektet Zhvillimore

Basketbolli 3x3

Marketingu

Komunikimi

Më herët, në këtë program kanë diplomuar Sekretarja e Përgjithshme e FBK-së, Elvira Dushku, Drejtori i Programeve dhe Projekteve Zhvillimore, Granit Rugova.

Me kënaqësi ju njoftojmë se Federata e Basketbollit e Kosovës (FBK) do të vazhdojë organizimin e FIBA Europe Qualifiers Cup 3x3 për vitin 2026 dhe 2027

Ky vendim vjen si rezultat i suksesit të jashtëzakonshëm në organizimin e turneut gjatë viteve 2024 dhe 2025, duke e vendosur Kosovën në hartën e ngjarjeve madhore ndërkombëtare të basketbollit 3x3.

Profesionializmi, përkushtimi dhe bashkëpunimi me institucionet ndërkombëtare e kanë bërë FBK-në një partner të besueshëm për FIBA-n, dhe një shembull i shkëlqyer se si organizohen eventet sportive në nivel të lartë.

Ky është një lajm që përforcon pozitën e Kosovës si qendër e rëndësishme e basketbollit 3x3. 

Organizimet e deritanishme kanë treguar për mikpritjen, energjinë dhe pasionin që vetëm publiku kosovar di ta ofrojë në ngjarje të këtij niveli.

Federata e Basketbollit e Kosovës çdo vit organizon ngjarje ndërkombëtare me pjesëmarrje të shumë shteteve në vendin tonë, duke marrë lëvdata nga FIBA.

Kujtojmë se FBK ka organizuar me sukses në qendër të Prishtinë në dy vitet e fundit, FIBA Europe Qualifiers Cup 3x3 te meshkujt dhe femrat, ku ne edicionin e fundit morën pjesë 11 shtete.  

Nga 23 deri më 26 qershor 2025, Vlora Braha mori pjesë në Workshopin e Delegatëve Teknikë të FIBA-s për ciklin 2025–2029, i cili u mbajt në Athinë, Greqi.

Ky ishte një hap i rëndësishëm drejt forcimit të integritetit dhe rritjes së standardeve teknike në basketbollin kosovar.

Braha theksoi se kjo punëtori shërbeu si një platformë mjaft e vlefshme për shkëmbimin e përvojave, përditësimin me rregulloret dhe rregullat më të fundit të FIBA-s, si dhe për ngritjen e mëtejme të profesionalizmit në mbikëqyrjen teknike të ndeshjeve. Gjatë aktivitetit, u trajtuan raste praktike, u diskutuan risitë procedurale dhe teknologjitë e reja në përdorim, ndërsa pjesëmarrësit u angazhuan edhe në simulime konkrete që ndihmojnë në rritjen e efikasitetit dhe saktësisë në vendimmarrje gjatë ndeshjeve.

Në përfundim të kësaj punëtorie, Vlora Braha u rilicensua zyrtarisht si Delegate Teknike e FIBA-s për një periudhë katërvjeçare (2025–2029), duke përforcuar më tej rolin e saj profesional në garat ndërkombëtare.