Të premten Komiteti Olimpik i Kosovës (KOK) ka mbajtur Asamblenë e Punës dhe Zgjedhore.

Në këtë mbrëmje janë përkujtuar edhe kontribuuesit nga sporti i Kosovës, mes tyre edhe nga basketbolli, që ndërruan jetë më 2024.

Nga basketbolli janë përkujtuar Nexhdet Hoxha, Ergin Sherifi, Tyrhan Kosova, Shirin Hyseini dhe Shaban Miftari.

Nexhdet Hoxha ka qenë gjyqtar i basketbollit dhe vëzhgues për vite të tëra. Ka gjykuar ndeshje të ligës së Beogradit, kurse pasi ka fituar thirrjen e Gjyqtarit Republikan edhe ndeshje të Ligës së Serbisë, të grupmoshave të ndryshme. Me tu kthyer në Kosovë, në vitet e 80-ta për një kohë ka gjykuar edhe ndeshje të Ligës së Kosovës. Që nga sezoni 2005/06 ka qenë vazhdimisht delegat i ndeshjeve të Superligës, ndeshje finale të play-offit, Kupës, turneve ndërkombëtarë në Kosovë dhe ngjarjeve tjera të rëndësishme. Hoxha, së bashku me Lulzim Malokun, kanë qenë delegatët e parë kosovarë të Ligës Ballkanike BIBL, garës së parë ndërkombëtare ku kanë marrë pjesë klubet e Kosovës. Gjithashtu ka qenë vëzhgues në Ligën Trocal, si dhe anëtar i Bordit të Shoqatës së Gjyqtarëve. Po ashtu ishte delegat i FBK-së.

Ergin Sherifi ka qenë basketbollist i Dritës nga viti 1975 deri në vitin 1982.

Më pas në kohët e vështira ishte edhe gjyqtar nga viti 1986 deri më 1990 dhe njihej si një gjyqtar me respekt të jashtëzakonshëm. Po ashtu ishte edhe trajner i basketbollit, nga viti 1991 deri më 1998, kurse në edicionin 1996-97, e kishte shpallur Dritën kampion të Kosovës. Ergini pasluftës rikthehet sërish si gjyqtar në basketbollin e Kosovës, nga 1999 deri më 2014, kurse më pas ishte vëzhgues. Për kontributin e tij, FBK e kishte nderuar me mirënjohje.

Tyrhan Kosova ka dhënë kontribut në basketboll, si ish-basketbollist i dalluar i Bashkimit, kurse së fundmi ishte edhe kryetar i KB Bashkimi në vitin 2022.

Ndarja nga jeta në moshën 62 vjeçare na ka pikëlluar të gjithëve, por Kosova do të mbahet mend si punëtor shumë i dalluar dhe shembull për të gjithë ne.

Shirin Hyseini ishte Kryetare e KB Universiteti Femrat, në kohët e arta të klubit prishtinas, por edhe basketbollit të Kosovës në konkurrencën e femrave, duke arritur suksese të mëdha.

Shirin Hyseini ishte e nderuar dhe e respektuar nga të gjithë, andaj do ta kujtojmë gjithmonë kështu.

Shaban Miftari ishte kryetarit shumëvjeçar i Klubit Basketbollit Trepça. Kontributi i tij ishte i jashtëzakonshëm në klubin mitrovicas, por edhe basketbollin e Kosovës.

Ai ishte shembull dhe motiv i madh për gjeneratat e reja, e kështu do të mbahet mend gjithmonë. Miftari kishte respekt të madh nga të gjithë, andaj ndarja nga jeta e tij na ka pikëlluar të gjithëve.