Përfaqësueset e Kosovës te grupmoshat e reja në konkurrencën e meshkujve i kanë filluar përgatitjet për garat e rëndësishme që i pret gjatë verës.

Kosova U20 dhe U18 janë grumbulluar të mërkurën, derisa U16 të premten (sot) në palestrën “1 Tetori”.

Ky është vetëm fillimi i përgatitjeve dhe pasi javën e ardhshme do të ketë grumbullime të radhës, e grumbullimet do të vazhdojnë deri gjatë verës, kur lista do të shkurtohet dhe do të përzgjidhen basketbollistët që do të jenë pjesë e përgatitjeve intensive.

Ditë më parë janë emëruar edhe trajnerët dhe ndihmëstrajnerët që do të drejtojnë grupmoshat e reja te meshkujt. Ata do të vëzhgojnë nga afër përgatitjet për të parë formën e lojtarëve dhe për të përzgjedhur basketbollistët më të mirë për një përfaqësim sa më dinjitoz në garat evropiane.

U20 te meshkujt janë në Grupin D, së bashku me Turqinë, Suedinë, Hungarinë dhe Shqipërinë. Divizioni B në konkurrencën e meshkujve do të mbahet në Yerevan të Armenisë nga 11 deri më 20 korrik.

U18 i meshkujve do të përballet me Hungarinë, Zvicrën, Finlandën, Estoninë dhe Çekinë. Divizioni B i U18 te meshkujt do të organizohet nga 25 korriku deri më 3 gusht në Pitesti në Rumani. 

U16 meshkujt janë shortuar në Grupin C, ku do të përballen me Holandën, Kroacinë, Danimarkën, Islandën dhe Ukrainën. U16 meshkujt marrin pjesë në Divizionin B, në Shkup të Maqedonisë Veriore. Ky kampionat organizohet nga 7 deri më 16 gusht.