Në një kohë kur historia e sportit shpesh mbetet jashtë vëmendjes së kujtesës kolektive, dokumentari “4 Çerekët” vjen si një rikthim emocionues te rrënjët e basketbollit kosovar.

Nën drejtimin kreativ të autorit dhe producentit Leart Hoxha, prodhim i Katror Media dhe me kontributin e ish-basketbollistit dhe gazetarit sportiv Blerim Vuniqi, ky projekt që është mbështetur nga Ministria e Kulturës, Rinisë dhe Sportit, përpiqet jo vetëm të tregojë por edhe të ruajë për brezat e ardhshëm një rrëfim të dokumentuar për sportin e basketbollit në Kosovë - për sportistët, ngjarjet dhe momentet që e kanë formësuar atë.

Dokumentari është strukturuar në katër episode - një ndarje simbolike që ndjek formatin e një ndeshje basketbolli. 

Çereku i parë përfshin fillesat e sportit, merret me fillimet e basketbollit, që nga vitet e 40-ta deri te ngritja e Buduqnostit të Pejës në vitet e ’60-ta.

Çereku i dytë fokusohet në dy klube kyçe Elektrokosova te meshkujt dhe Universiteti te femrat – që kanë përcaktuar drejtimin e zhvillimit sportiv në Kosovë.

Çereku i tretë përfshin periudhën më dinamike: pjesëmarrjen në ligat e ish-Jugosllavisë, mëvetësimin e sportit dhe sfidat gjatë okupimit e pasluftës.

Çereku i fundit tregon përpjekjet për ndërkombëtarizim, nga përfshirja në ligën Trocal dhe BIBL deri te anëtarësimi i FBK-së në FIBA në vitin 2015.

Episodi i parë i dokumentarit “4 Çerekët” do të ketë premierën zyrtare më 25 prill, përballë komunitetit të basketbollit, sportistëve dhe publikut të gjerë.

Kjo ngjarje e rëndësishme do të mbahet në Kolegjin AAB të premten nga ora 18:00.