Federata e Basketbollit të Kosovës (FBK), në përputhje me Ligjin e ri për Sportin në Kosovë dhe udhëzimet e fundit të FIBA-s, ka përditësuar kontratat standarde që rregullojnë marrëdhëniet ndërmjet klubeve dhe lojtarëve.

Qëllimi kryesor i këtyre modeleve të kontratave është të ofrohet një bazë e përbashkët që garanton përfshirjen e dispozitave obligative të kërkuara nga legjislacioni i Kosovës dhe nga rregulloret ndërkombëtare të FIBA-s. Kontratat janë hartuar për të rritur qartësinë juridike, transparencën dhe sigurinë për të gjitha palët - si për klubet, ashtu edhe për vetë lojtarët.

Ky veprim përfaqëson një hap konkret drejt qeverisjes më të mirë në sport dhe përforcimit të standardit profesional të marrëdhënieve kontraktuale në basketbollin e Kosovës. Në të njëjtën kohë, kontribuon në mbrojtjen e të drejtave të të gjitha palëve të përfshira, duke shmangur paqartësitë dhe praktikat jo të harmonizuara në lidhje me marrëveshjet ligjore.

Zyra Ligjore e FBK-së ka përgatitur dhe vënë në dispozicion këto versione të kontratave shabllon:

• Kontrata standarde Klub–Lojtar për klubet e meshkujve (në shqip),
• Kontrata standarde Klub–Lojtare për klubet e femrave (në shqip),
• Kontrata standarde Klub–Lojtar (në anglisht), për përdorim për lojtarë/e të huaj/a.

Këto dokumente janë publikuar në ueb-faqen zyrtare të FBK-së (vegëza: Legjislacioni -> Formularët) dhe janë shpërndarë zyrtarisht te të gjitha klubet.

Përdorimi i këtyre kontratave standarde rekomandohet fuqimisht, si një ndihmë praktike për klubet në përgatitjen e marrëveshjeve kontraktuale. Megjithatë, liria kontraktuale e palëve mbetet e garantuar, për aq sa nuk cenohen dispozitat detyruese të ligjit dhe rregulloreve në fuqi.

Për çdo pyetje ose sqarim, klubet mund të kontaktojnë Zyrtaren Ligjore të FBK-së në:

enea.hajdari@basketbolli.com.