Superkupa e Prizrenit 16

Prizreni 16 ka fituar Superkupën e Kosovës, duke mundur në finale Trepçën me rezultat 90:81 (22:17, 24:16, 15:24, 29:22).

Ndeshjen më mirë e nisi skuadra prizrenase, që kishte deri në tetë pikë epërsi, 15:7, megjithatë mitrovicasit rikthehen shumë shpejt për të barazuar rezultatin në 17:17, ndërsa çereku i parë përfundon 22:17. Lojë interesante u zhvillua në periudhën e dytë, ku në fund të saj shkëputen prizrenasit, që shkojnë në pushim me rezultat 46:35, që ishte edhe epërsia më e lartë në pjesën e parë.

Mitrovicasit e fillojnë furishëm periodën e tretë, duke afruar shifrat në 56:53, e më pas për të barazuar në 59:59, kurse rezultati në semafor pas 30 minutash ishte 61:59, duke bërë që 10 minutat e fundit të jenë shumë interesant.  

Lojë dramatike dhe interesante u zhvillua deri në fund, por në çastet e fundit prizrenasit ishin më të vëmendshëm dhe triumfuan 90:81.

Trofeun MVP e fitoi Arti Hajdari, çmim të cilin ia ndau Sekretarja e Përgjithshme e Federatës së Basketbollit të Kosovës, Elvira Dushku, kurse trofeun kapitenit të Prizrenit 16, Qëndrim Ajazaj ia dorëzoi kryetari i Federatës së Basketbollit të Kosovës, Arben Fetahu.

‍