Super sfida mes Pejës dhe Trepçës

Gjysmëfinalja e parë e Final 8 Kupës së Kosovës Agim Lluka, do të dhurojë një super përballje mes Pejës dhe Trepcës. Të dy skuadrat shpresojnë të kualifikohen në finalen e madhe.

Pejanët janë organizatorë të Kupës dhe të pëkrahur nga tifozët vendas besojnë të fitojnë trofeun e çmuar, kurse mitrovicasit janë shumë të organizuar në këtë edicion, duke rritur ambiciet për trofetë në basketbollin e Kosovës, si Kupa dhe titulli.

Në këtë edicion të elitë, pejanët kanë 11 fitore dhe shtatë humbje, kurse mitrovicasit kanë 13 fitore dhe gjashtë humbje.

Në këtë edicion, këto skuadra janë përballur tri herë dhe në këto takime fitore shënuan ‘Xehetarët’ me shifrat 83:66, 87:93 dhe 96:81.

Peja në çerekfinale kishte mundur Sigal Prishtinën me rezultat 91:86, kurse më lehtë e kishte Trepça ndaj Rahovecit, duke e mposhtur me shifrat 77:57.

Takimet mes këtyre dy skuadrave gjithmonë kanë qenë interesante dhe kështu pritet edhe sonte.

Ndeshja zhvillohet nga ora 17:00 dhe transmetohet në Kujtesa dhe Art Motion.

‍