Xhiroja e 22-të në elitën e basketbollit të Kosovës ka dhuruar ndeshje mjaft interesante dhe dramatike.

Basketbollisti më i mirë i kësaj xhiro është Ivan Koljeviq i Rahovecit. Ai ndaj ish-skuadrës së tij, Prizrenit 16, ishte i motivuar, duke e mbyllur ndeshjen me 24 pikë, pesë kërcime dhe tri asistime, ndërsa Vreshtarët shënuan fitore shumë të rëndësishme 95:85. Ndihmë të madhe ka dhënë edhe qendra në top-formë, Fisnik Rugova, me 19 pikë, shtatë kërcime dhe shtatë asistime.

Derbin e xhiros e ka fituar Trepça, që mundi Golden Eagle Yllin me shifrat 63:67. Te mitrovicasit u dallua Rodney Purvis me 19 pikë, dy kërcime e dy asistime. Përforcimi i fundit i ‘Xehetarëve’, sidomos në momentet vendimtare ishte jetik për skuadrën mysafire, që shënoi fitore shumë të vlefshme.

Peja mundi Bashkimin në udhëtim 61:76, në derbin e rivalëve të vjetër në basketbollin e Kosovës. Te pejanët më i miri në parket ishte Courtney Fells me 16 pikë, gjashtë kërcime dhe gjashtë asistime.

Ndërkohë, fitore të pritur regjistroi Sigal Prishtina, duke mundur Dritën me 100 pikë dallim, 145:45. Te kryeqytetasit u dallua Meriton Ismaili me 36 pikë, pesë kërcime dhe pesë asistime.

Top 5

Ivan Koljeviq 24 pikë, 5 kërcime, 3 asistime

Fisnik Rugova 19 pikë, 7 kërcime, 7 asistime

Rodney Purvis 19 pikë, 2 kërcime, 2 asistime

Courtney Fells 16 pikë, 6 kërcime, 6 asistime

Meriton Ismaili 36 pikë, 5 kërcime, 5 asistime