Fillon Seminari për klubet e FBK-së

Në Prishtinë ka filluar Seminari i Dytë për Klubet, i organizuar nga Federata e Basketbollit e Kosovës. Seminari është treditor, pra do të mbahet deri të dielën, ndërsa qëllimi është zhvillimi dhe fuqizimi i klubeve të basketbollit.

Fuqizimi i Klubeve të FBK-së është një nga pesë qëllimet e FBK-së në Planin Strategjik 2021-2025, të cilin Federata e Basketbollit të Kosovës e ka hartuar në bashkëpunim me FIBA-n dhe ekspertët e jashtëm të angazhuar nga institucioni më i lartë i basketbollit në botë.

Në ditën e parë kanë ligjëruar ekspertët nga FIBA, Pedro Correia dhe Florian Pasquet me temat Licencimi i Klubeve dhe Qeverisja dhe Menaxhimi Financiar i Ligës, ndërsa më pas do të ligjërojë edhe Geoff Wilson.

Ekspertët nga FIBA kanë treguar se si duhet të jetë licencimi i klubeve në mënyrë që të jenë sa më profesionale, si dhe Qeverisjen e Menaxhimin Financiar të Ligës.

Përfaqësuesit e Klubeve nga Superliga, Liga e Parë dhe Dytë në të dyja konkurrencat kanë bashkëbiseduar në lidhje me këto tema, si dhe janë interesuar se si të funksionojnë në mënyrë profesionale.

Gjithashtu të pranishmëve i është drejtuar edhe kryetari i FBK-së, Arben Fetahu, duke folur për rëndësinë e këtij seminari.

Ky është Seminari i Dytë i organizuar nga FBK në bashkëpunim me FIBA-n. Seminari i Parë  është  organizuar në fund të muajit shkurt, ku klubet pjesëmarrëse kanë  pasur rastin të  mësojnë për temat si: Menaxhimi i brendit dhe angazhimi digjital me tifozë; Veprimet në ditën e ndeshjes dhe angazhimi me tifozë në ditën e ndeshjes; dhe Sponsorizimi dhe investimet nga sektori publik.

‍