Kosova është shpallur kampione e FIBA U18 Women’s EuroBasket, Divizioni C.

Ky Evropian u zhvillua në Prishtinë nga 23 korriku, derisa përfundoi në mënyrën më të mirë të mundshme me triumfin e vashave të Kosovës.

Dardanet në finale triumfuan ndaj Azerbajxhanit me rezultat 75:65 (27:24, 13:9, 24:17, 11:15).

Kosova e mbështetur nga tifozët e nisi ndeshjen më mirë dhe më e motivuar, duke shkuar në epërsi deri në shtatë pikë, 13:6, por mysafiret u rikthyen dhe kjo pjesë përfundoi 27:24. Vashat dardane në periudhën e dytë u shkëputën sërish në 36:24, por sërish mysafiret u rikthyen dhe pjesa e parë përfundoi 40:33.

Në pjesën e dytë, vashat e Kosovës ruajtën epërsinë dhe luftuan deri në fund, për të shënuar fitore të merituar dhe për të fituar 75:65.

Në sfidën për vendin e tretë, Shqipëria triumfoi ndaj Qipros 70:55, duke dominuar gjatë gjithë ndeshjes dhe duke fituar medaljen e bronztë.

Në takimin për vendin 5-7, Gjeorgjia mundi Maltën 61:56, duke u renditur e pesta, derisa maltezet u renditën në vendin e gjashtë, kurse e fundit ishte Armenia.

Në fillim të ceremonisë, Sekretarja e Përgjithshme e FBK-së, Elvira Dushku ka pranuar çmimin për organizimin e Evropianit, çmim që iu nda nga Edwin Yeats, Komisioner i FIBA-s.

Dushku ka ndarë çmimin Fair Play, që iu nda kapitenes së Shqipërisë, Luna Luca.

Sekretarja e Përgjithshme së bashku me zëvendës sekretarin e Përgjithshëm të FBK-së, Adriatik Rraci kanë ndarë çmimet për Top 5, ku ishin: Dimitra Eftychiou e Qipros, Martina Haxhiu e Shqipërisë, Silan Akbingol e Azerbajxhanit, Flutra Mehmeti e Kosovës dhe Angelina Ismayilova e Azerbajxhanit.

MVP e Evropianit është shpallur Flutra Mehmeti e Kosovës, çmim që u nda nga Kryetari i FBK-së, Arben Fetahu.

Në fund, trofeu i kampionit kapitenes së Kosovës, Malvina Haziri iu nda nga John Gonzalves, President i FIBA Small Countries dhe anëtar i Bordit të FIBA Evropës.

Me këtë përfundoi edhe Evropiani në Prishtinë, që për pesë ditë ishte festë e basketbollit.