Titulli i pozitës

Koordinator i Programit Afatgjatë për zhvillimin e basketbollit në Kosovë

Përshkrimi i përgjithshëm i punës:

Koordinatori i Përgjithshëm do të jetë përgjegjës për menaxhimin dhe monitorimin e të gjitha aspekteve të Programit Afatgjatë për zhvillimin e basketbollit në Kosovë për periudhën 2024-2029.

Ky program do të realizohet nga Federata e Basketbollit e Kosovës (FBK) në bashkëpunim me Ministrinë për Kulturë, Rini dhe Sport, si dhe grupe të tjera të interesit.  

Ai/Ajo do të sigurojë që të Katër Shtyllat e programit (Edukimi i Trajnerëve, Zhvillimi i Basketbollit 3x3, Zhvillimi i Infrastrukturës dhe Zhvillimi i Basketbollit Bazë) të zbatohen në përputhje me qëllimet dhe afatet e përcaktuara.

 Detyrat dhe Përgjegjësitë

Menaxhimi i programit

• Koordinimi i aktiviteteve në të katër shtyllat e programit.
• Hartimi dhe zbatimi i planeve strategjike për secilën shtyllë.
• Sigurimi i bashkëpunimit efektiv ndërmjet mbikëqyrësve të shtyllave dhe partnerëve të jashtëm.

Monitorimi dhe raportimi

• Mbikëqyrja e progresit të programit.
• Vlerësimi i zbatimit të objektivave afatshkurtra dhe afatgjata të programit.
• I raporton në baza ditore/javore Drejtorit të Programeve dhe Projekteve Zhvillimore në FBK, kurse do ti raportoj për programin në baza mujore Bordit të FBK-së, nëpërmjet Sekretares së Përgjithshme.

Buxhetimi dhe planifikimi financiar

• Menaxhimi i buxhetit të programit në koordinim me Drejtorin e Programeve dhe Projekteve Zhvillimore në FBK dhe me ekipin financiar të FBK-së.
• Sigurimi që çdo shtyllë e programit të zbatohet në mënyrë efikase dhe brenda kufijve të buxhetit të miratuar.

Komunikimi dhe bashkëpunimi

• Komunikimi i rregullt me MKRS, klubet e basketbollit, trajnerët dhe grupet e tjera të interesit për ecurinë e programit.
• Organizimi i takimeve të rregullta me mbikëqyrësit e shtyllave për të siguruar përparim të qëndrueshëm.

Sigurimi i cilësisë

• Sigurimi i cilësisë dhe efikasitetit në zbatimin e çdo aspekti të programit.

Kualifikimet e kërkuara

• Diplomë Universitare në Menaxhim Sportiv, Administratë Publike, ose fusha të ngjashme.
• Eksperiencë e mëparshme në menaxhim të programeve sportive, preferohet në basketboll.
• Aftësi të shkëlqyera organizative dhe aftësi për të menaxhuar projekte të mëdha.
• Njohuri për zhvillimin e sportit në nivel lokal dhe ndërkombëtar.
• Aftësi të forta komunikimi dhe koordinimi.
• Aftësi në përdorimin e softuerëve të menaxhimit të projekteve dhe të buxhetit.

Të gjithë ata/o që posedojnë aftësitë dhe kualifikimet e kërkuara më lartë, si dhe dëshirojnë të bëhen pjesë e ekipit të Federatës së Basketbollit të Kosovës janë të mirëpritur të aplikojnë deri në 20.09.2024 duke dërguar CV-në dhe një letër motivuese në adresën: sekretari@basketbolli.com me titullin Koordinatori i Përgjithshëm i Programit Afatgjatë për zhvillimin e basketbollit në Kosovë.

Kandidatët e përzgjedhur në listën e ngushtë do të ftohen për intervistë nëpërmjet telefonit.