Sot nga ora 11:00 në Munih të Gjermanisë do të hidhet shorti për grupmoshat e reja që do të marrin pjesë në garat evropiane gjatë verës.

Në hedhjen e shortit, nga Kosova po marrin pjesë Adriatik Rraci, Drejtor i Përfaqësueseve të Kosovës dhe Artina Hasani, Menaxhere e Eventeve dhe Basketbollit 3x3 në FBK.

Kosova do të paraqitet me pesë grupmosha në të dyja konkurrencat në garat ndërkombëtare.

Federata e Basketbollit të Kosovës do të organizojë FIBA U-16 Women’s EuroBasket 2025 Divizioni C, që do të mbahet nga 8 deri 13 korrik 2025. Ky Evropian do të mbahet në Pejë.

Përveç me U16F, Kosova do të paraqitet edhe me U20, U18, U16 në konkurrencën e meshkujve dhe U18 te femrat, në Divizionin B. U20 (Divizioni B) në konkurrencën e meshkujve do të mbahet në Yerevan të Armenisë nga 11 deri më 20 korrik.

U18 i femrave do të mbahet nga 4 deri më 13 korrik. Kujtojmë që vashat e Kosovës kishin triumfuar këtë verë në Divizionin C në Prishtinë dhe tashmë garojnë në Divizionin B.

Divizioni B i U18 te meshkujt do të organizohet nga 25 korriku deri më 3 gusht në Pitesti në Rumani. Meshkujt U16 që po ashtu fituan në Divizionin C në Shqipëri, tashmë marrin pjesë në Divizionin B, në Shkup të Maqedonisë Veriore. Ky kampionat organizohet nga 7 deri më 16 gusht.