FBK merr pjesë në Kursin për Administratorë Sportivë të organizuar nga KOK-u

Federata e Basketbollit të Kosovës, në bashkëpunim me Komitetin Olimpik të Kosovës (KOK), këtë fundjavë do të marrë pjesë në Kursin për Administratorë Sportivë.

Ky kurs, i organizuar nga KOK-u dhe Akademia Olimpike, ka për qëllim zhvillimin e kapaciteteve profesionale të administratorëve të klubeve sportive, duke ofruar njohuri teorike dhe praktike mbi menaxhimin efektiv të organizatave sportive. Pjesëmarrja përfaqëson një mundësi të vlefshme për forcimin e strukturave administrative të klubeve të basketbollit dhe për rritjen e cilësisë së punës institucionale.

Ligjërues në këtë kurs do të jenë Ibër Alaj, Drejtor i Departamentit të Sporteve në Ministrinë e Kulturës, Rinisë dhe Sportit, Fitim Arifi, Drejtor për Edukim në Akademinë Olimpike, si dhe Stavri Bello nga Instituti i Kërkimit Shkencor në Universitetin e Sporteve të Tiranës dhe vëzhgues i basketbollit në FIBA.

Gjatë kursit, pjesëmarrësit do të zhvillojnë detyra praktike dhe në përfundim do të certifikohen si administratorë sportivë.

‍