Fitore bindëse e Kosovës, kualifikohet në gjysmëfinale

Kosova U18 (M) ka shënuar fitore bindëse ndaj Moldavisë me shifrat 45:108 (13:44, 13:23, 9:20, 10:21), në FIBA European Challenger, që po zhvillohet në Tiranë.

Kosova e nisi ndeshjen për mrekulli, me një seri prej 0:14, duke dominuar në total nga fillimi dhe periudhën e parë e fiton 13:44. Dardanët vazhduan me lojë të mirë edhe në çerekun e dytë, ku e fituan me dhjetë pikë dallim dhe shkuan në pushim me epërsi të thellë 26:67.  

Kosova vazhdoi me lojë të mirë dhe kolektive, duke thelluar epërsinë minutë pas minute, kurse rezultati në semafor pas 30 minutash ishte 35:87. Basketbollistët e Kosovës nuk e ndalën ritmin e lartë as në 10 minutat e fundit, duke dominuar nga fillimi deri në fund dhe triumfoi me shifrat 45:108.

Te Kosova u dalluan Bardh Istrefi me 12 pikë e gjashtë kërcime, Hajriz Hazeri me tetë pikë, tetë kërcime e pesë asistime, Enes Huduti me nëntë pikë e shtatë kërcime, Anes Gashi me 16 pikë e Rinol Gashi me 15 pikë, kurse 12 lojtarët e Kosovës u aktivizuan në këtë përballje.

Kosova e përfundoi grupin si lider me dy fitore në dy ndeshje, Shqipëria e dyta me një fitore dhe një humbje, që po ashtu u kualifikua në gjysmëfinale, kurse Moldavia me dy humbje do të luajë për pozitat 5-7.

Kosova në gjysmëfinale do të ballafaqohet me Andorrën të shtunën.

‍